país que sopla en cuenta falar

L`aspiración de los probes yera organizase y baltar el capital. Pa baltar esti sistema contaba la fuercia, y cuantos más fuéremos más punxu díbemos tener. Asina que, lo grandono, el estáu descomanáu ya l`internacionalismu yeren les señes de los trabayaores organizaos tres d`una ideoloxía que los diba lliberar. Poco cuntaba lo del sitiu, y muncho menos la llingua del país. Yéremos toos iguales.
En estes tenemos que los que falaben la llingua del país nun miraben pa ella, y los que teníen el poder tampoco nun conservaben la llingua. Taba la llingua condergada de mano a morrer.
Pero ha! n`otros sitios los que teníen delles posiciones diéronse cuenta que tirar polo de casa aportábayos beneficios. Pa conservar lo que teníen, había que tener les mires no de cerca. Y qué otro más amañoso que entamala cola indentidá. Somos hestóricamente deferenciaos, tenemos los nuesos drechos. ¡ La mio tierra ye un país ! (y de pasu lo mío queda equí)
Cosa tala que n`Asturies nun pasó. Los que teníen perres nun se preocuparon de afitar una identidá rexonal, y los que sentíen una identidá rexonal nun teníen perres pa facer nada... y pasaron los años y pasaron los años y n´eses tamos entá. Ensin pidir pa nós, nin porque seyamos "un país" nin porque vraeramente Asturies ta mui mal y la mocedá nun tien de qué vivir. Somos un país que duerme, que calla, que xunta cien gaiteros pero que nun diz nada. Somos, en pallabres d´Ánxel Nava, un país que como nun fala, sopla.